PRO-7 nangandam pagbukas sa klase
CEBU, Philippines - Nangandam na ang Police Regional Office-7 sa pagbukas sa klase karong Lunes. Matud ni PRO-7 Deputy Director Orlando Ualat nga iyang pabutangan og mga pulis ang mga tunghaan ilabi na sa Metro Cebu diin posibleng daghan ang krimen.
Giawhag sa kapolisan ang mga tinun-an nga tagoan ug ibutang ang mga gadgets sa hustong lugar ug gamiton lang kini sulod sa eskwelahan.
Atol sa ika-74 nga Talakayan sa Isyung Pulis kagahapon, gibutyag sa hepe sa Regional Operations and Plans Division, S/Supt. Erson Digal, nga ipaubos sa high alert status ang kapolisan sa Probinsya sa Sugbo sugod karong Domingo. Usa sa ilang gitan-aw ang pagpagkig-alayon sa mga lokal nga opisyal sa kabarangayan.
Makigtagbo usab ang kapolisan sa kadagkoan sa mga tunghaan aron hisgutan ang ilang mga security measures.
Giawhag ni Digal ang mga tunghaan nga magbutang og CCTV camera kung kaya ang pagpalit sa maong kahimanan.
Ang mga drug pushers ang lakip sa gimonitor kapolisan nga posibling mopahimulos sa panahon sa pagbaligya og drugas sa kabataan ilabi na kadtong mo-eskwela sa gabii.
Gihangyo usab sa kapolisan ang mga ginikanan nga dili padalhon og mga mahalonng gadget ang ilang mga anak aron dili na sab matintal pa ang mga badlungon.
Si Supt. Rex Derilo mipasabot ang ilang ipatuman sa pagbukas sa klase maoy sumbanan sa ilang pagpangandam sa umaabot nga APEC Summit nga himoon sa Sugbo sunod tuig. (BANAT NEWS)
- Latest
