Ulitawo niunay sunog sa ilang balay
CEBU, Philippines - Giunay pagsunog sa usa ka lalaki ang iyang balay sa Purok Golden Duranta, Yati, Liloan niadtong Martes sa gabii hinungdan sa pagkasunog sa laing upat ka tupad nga balay diin duha ang naugdaw.
Giingong kaduha na gisulayan og sunog ni Jose Partolan, 36, ulitawo, ang iyang balay apan nagpugngan sa iyang igsoon.
Si SFO3 Tyron Gocela, imbestigador sa kabomberohan sa lungsod sa Liloan miila sa naugdaw nga panimalay nga gipanag-iya nila ni Fe Partolan ug Gemma Partolan ug nakasinati usab og kadaut ang laing duha ka panimalay nga gipanag-iya nila ni Mitchelle Arcilla ug Mark Anthoneth Salingga.
Sa imbestigasyon sa kabomberohan nasayran nga nibahad na ang suspetsado nga iyang sunogon ang balay nga iyang gipuy-an.
Matud ni Gocela nga milampos na gyud sa pagsunog sa panimalay sa mga biktima sa miaging gabii dihang walay usa kanila nga nakabantay sa pagduslit nga nakaingon na gayod sa pagkaugdaw apan walay naangol o kinabuhing nakalas. Ang suspetsado nga ilang gidakop sa miaging gabii giingong high pa kini sa paggamit sa ilegal nga drugas.
Sumala pa nga giangkon sa suspetsado nga siya ang nagsunog gamit ang lighter pinaagi sa pagduslit sa bongbong nga amakan sa ilang kusina hangtod nga midako ang kayo.
Gibanabanang mokabat sa P100,000 ang danyos nga gibilin sa sunog samtang ang suspek gitanggong na sa selda sa kapolisan ug gikatakdang pasakaan og kasong arson. (BANAT NEWS)
- Latest
