Biyuda gipatay

CEBU, Philippines - Usa ka 76-anyos nga biyuda ang napalgang patay nga wala nay sapot sud sa iyang balay sa lungsod sa Barili, ang kapolisan nagduda nga gitulis ug gilugos ang biktima una pa kini gipatay.

Wa nay kinabuhi dihang napalgan si Maximina Panugaling nagpuyo sa Sitio Divine Mercy, Barangay Tubod sa maong lungsod dihang nadiskubrehan  alas 8:30 kagahapon sa buntag.

Sa imbestigasyon sa Barili Police Station, gitug-an ni PO2 Jotemar Tejano nga niadtong Martes sa buntag, nanguha og bayabas ang 6-anyos nga apo sa biktima kilid sa balay niini dihang nasigpatan niini ang iyang lola nga nagbuy-od na sa sud sa kwarto ug way sapot. Sa pagsusi sa mga polis nagkatag na ang mga butang sulod sa kwarto niini ug duna kini’y mga bun-og sa kalawasan ug may samad sa iyang ulo nga gituhoan inagian sa pagbunal sa usa ka gahi nga butang nga maoy hinungdan sa iyang kamatayon.

Matud pa ni PO2 Tejano nga nag-inusara na lang nga nagpuyo ang maong biktima sa iyang balay apan silingan niini ang iyang anak nga 100 metros ang gilay-on gikan sa panimalay niini.

Buot karon ipasusi sa kapolisan kun gilugos ang biktima ug ilaha karong gipaabot ang autopsy report sa Scene of the Crime Operative (SOCO).

Base sa pamahayag sa doktor nga unang mihiling sa patay nga lawas sa maong lola, gituhuang Domingo pa sa gabii gihimo ang maong krimen. (BANAT NEWS)