JVR nalipay CHED modumala sa TCC

CEBU, Philippines - Nalipay si Talisay City Mayor Johnny De los Reyes sa desisyon sa Board of Trustees sa Talisay City College (TCC) nga ang Commission on Higher Education (CHED) lang una ang modumala sa tunghaan.

Ang duha ka gitudlong presidente sa TCC nga sila si Richel Bacaltos ug Dr. Paulus Mariae Cañete ang pakanaugon sa ilang mga posisyon.

Si De los Reyes nagkanayun nga iyang i-revoke ang Executive Order sa pagtudlo kang Cañete.

Kahinumduman nga si Bacaltos ang gitudlo sa BOT nga presidente sa TCC samtang si Cañete gitudlo sa mayor.

Matud usab sa mayor nga pasweldohan na ang mga job order nga trabahante sa TCC diin ang kagamhanan sa siyudad mangita og pondo diin posibleng ipaapil sa supplemental budget.

Si Bacaltos sa iyang bahin nagkanayon nga andam siya pagtugyan sa mga dokumento ug records sa tunghaan ngadto kang CHED-7 Regional Director Freddie Bernal kinsa maoy molingkod isip officer-in-charge (OIC) sa TCC.

Nunot niini, si Konsehal Richard Francis Aznar nagkanayon nga ang search committee nga gilangkuban sa CHED, Cebu Normal University (CNU) ug Cebu Technological Technology (CTU) magsugod na sa paghan-ay og guidelines sa pagtudlo sa mosunod nga presidente sa TCC.

Usa sa rekisitos nga gisugyot ni Aznar nga mahimong presidente sa TCC mao nga usa ka Talisaynon ug walay kaso sa korte. (BANAT NEWS)