Drayber nag-pusher sikop

CEBU, Philippines - Usa ka 26 anyos nga kanhi habal habal drayber ang mitug-an nga napugos siya nga mamaligya og drugas human nabali ang iyang too nga bukton.

Si Ariel Villavelez, taga Tisa, dakbayan sa Sugbo, miingon nga nagkinahanglan siya og P20 mil aron ipatangtang ang stainless nga gibutang sa iyang bukton.

“Ako man unta ni ipatangtang ang stainless makakwarta nako, aron makabalik ko og drive og habal-habal,” matud ni Villavelez samtang nipatulo sa iyang luha.

Ang suspetsado nasikop sa City Anti-Drug Special Operation Task Force (CAIDSOTF) kagahapon sa hapon sa usa ka buy-bust operation.

Sa pagdala sa dinakpan sa Punta Princesa Police Station, kini mihangyo pa sa kapolisan nga unta siya tugutan nga makagawas ug makauli aron motambong sa birthday sa iyang dos anyos nga anak.

Apan ang hepe sa CAIDSOTF, Senior Insp. Eunil Avergonzado, miingon nga wala silay mahimo kun dili ang pagtanggong sa dinakpan gumikan sa iyang kaso nga giatubang.

Atol sa operasyon, nakabaligya pa ang dinakpan og usa ka pakete sa shabu ni PO3 Ian Miñoza isip poseur buyer sa kantidad nga P200.

Nakuha sa kapolisan gikan sa dinakpan ang 21 ka gagmay nga pakete sa shabu ug ang buy-bust money.

Samtang gidakop sa kapolisan ang usa ka tawo nga gikatahapang drug pusher atol sa buy-bust operation sa sitio Paradise, Tabok, dakbayan sa Mandaue niadtong Lunes sa buntag.

Ang nadakpan mao si Ponciano Calma Adlawan Jr., 25, ulitawo, taga Suba Pasil, dakbayan sa Sugbo kinsa nasakmitan og tulo ka paketeng shabu.

Matud ni PO2 Randy Dennis Batistis sa Presinto 3 sa kapolisan sa dakbayan sa Mandaue nga nahinabi sa Banat News nga nakadawat sila og mga taho labot sa ilegal nga kalihukan sa suspetsado. Dugang ni Batistis nga usa sa ilang kauban ang  ilang gihimong police decoy nga maoy nipalit og shabu bugti sa P200 nga mark money.

Ang mga dinakpan gikatakda nga pasakaan og kasong kalapasan sa Comprehensive Dangerous Drugs Act. (BANAT NEWS)