Inahan sa ikaduhang masuso nga giplasteran giawhag pagkooperar sa imbestigasyon
CEBU, Philippines - Giawhag sa Department of Health (DOH-7) ang inahan niadtong ikaduhang masuso nga gi-post sa Facebook nga gipapitlan ‘sab og plaster ang baba sud sa Maternity Hospital nga mohatag usab kanila og pamahayag.
Matud sa tigpamaba sa DOH-7 Suzette Jabonete ilang imbitaron sa Inter Agency Fact Finding Investigating Committee nga naghimo og imbestigasyon ang maong inahan alang sa usa ka corroborative investigation.
Ang DOH-7 miingon nga mas maayong anaa ang ginikanan sa maong bata aron ilang masayran kun unsa ang iyang reklamo.
Ang Commission on Human Rights nagtuo nga dako og matabang ang maong inahan sa nagpadayon nilang imbestigasyon bahin sa nahaunang reklamo sa pamilyang Noval kansang anak giplasteran sa baba sud sa nursery room sa maong tambalanan.
Si Noval nanawagan sa uban pang mga ginikanan nga nakasinati og susamang sitwasyon kanila kinahanglang motingog usab sila. Kagahapon sa gihimong inter-agency meeting, usa ka Lucresio Son, 54, residente sa Tabunan, siyudad sa Sugbo ang mipatim-aw ug miingon nga ang iyang apo giplasteran usab ang baba.
Sa report sa DYLA ang iyang apo gipanganak niadtong Agosto 8 sa miaging tuig ug milabay ang tulo ka adlaw dihang iyaha nga gikuha ang iyang anak ug apo namatikdan niini nga adunay tape ang baba sa bata. Hinoon wala siya makakuha og hulagway niini apan iyang gitataw nga di siya makalimot sa maong hitabo tungod kay gipamulta sila og kapin otso sientos pesos human na-delay ang pagkuha sa iyang apo. Nagpagawas og statement ang Maternity House pinaagi sa Board Of Trustees ug ilang gipadayag ang ilang pagmahay sa nahitabo kang Baby Yohannes Noval niadtong Mayo 9 ning tuiga lakip na usab ang nahitabo kang Baby Blaire Arsua nga nag-trending na usab sa social networking site.
Matud sa CPCMHI nga wala nila gitugot ang paggamit og pacifier ug plaster gawas kun kini gimando sa attending physician.
Nihimo na og linahing imbestigasyon ang Board of Trustees sa CPCMHI ug andam nilang dawaton ang mamahimong resulta sa imbestigasyon. (BANAT NEWS)
- Latest
