LTO palpak gihapon

CEBU, Philippines - Nagpabilin nga naghatag og dakong kahasol ang Land Transportation Office (LTO) ngadto sa mga motorista ug mga tag-iya’g sakyanan.

Ang mga tag-iya og sakyanan nga mopa-renew sa ilang rehestro kolektahan og tag P50 nga bayad sa sticker nga ipapilit sa plate number sa sakyanan aron dali ra mahibaw-an kun na-renew ba ang iyang rehestro.

Nahibaw-an nga ang LTO-Central Office mopadala ra og limitado nga gidaghanon sa mga plate stickers bisan og nahibaw-an na unta kun pila ang tanang sakyanan nga narehestro sa usa ka rehiyon. Pagka karon hapit na moabot og 650,000 ang tanan nga sakyanan nga ania marehestro sa Central Visayas ug sagad niini ania girehestro sa mga opisina sa LTO sa Sugbo. Daghan ang nakapangutana kun ngano nga limitado man ang gidaghanon sa mga stickers nga ipadala sa LTO-Central Office ngadto sa ilang mga regional offices.

Tungod kay limitado man ang gidaghanon sa mga plate stickers nga madawat sa LTO regional office, bahin-bahinon ra usab kini sa lainlaing LTO Branches.

Sama sa LTO-Talisay, ang mga stickers nga gipanghatag nila alang pa sa mga sakyanan nga gipa-renew kaniadtong Enero, Pebrero ug Marso. Kadtong mga nagparehestro sa Abril ug karong buwana, wala hatagi og plate stickers apan gikolektahan daan og bayad.

Ang ilang gihimo mao ang pagtatak lang sa kopya sa resibo pagbayad sa “renewal” sa pulong “registered, but no sticker available.” Sagad sa mga motorista hasolan na mobalik sa opisina sa LTO aron kuhaon ang iyang plate stickers kun moabot.

Kini maoy hinungdan nga daghan sa mga sakyanan nga nagdagan-dagan sa karsada ang plate numbers walay stickers nga nagpakita nga ang sakyanan narehestro ug wala pa mo-expire. (BANAT NEWS)