PDAF sa Toledo ipauli

CEBU, Philippines - Gimandoan sa Commission on Audit ang kagamhanan sa dakbayan sa Toledo nga ipauli ang wala nagamit nga pork barrel balor og P12.3 milyones ngadto sa nasudnong panudlanan.

Ang 2013 audit report nagbutyag nga ang siyudad nakadawat og Priority Development Assistance Fund balor og P40.5 milyones gikan sa mga kongresista ug senador apan P28.1 milyones lang ang nagamit sa tuig 2010 hangtud 2013.

Labing daku ang P38 milyones nga gihatag ni kanhi Kong. Pablo John Garcia apan P27.3 milyones lang ang nagamit.

Matud sa COA nga ilegal na ang paggasto sa PDAF human ang Korte Suprema nideklarar nga ilegal ang Pork Barrel System sa nasud. Ang kagamhanan sa siyudad mangita og paagi nga dili na mabalik ngadto sa nasudnong panudlanan ang maong pundo aron magamit sa ubang proyekto. Apan ang COA nirekomendar nga ipauli gyud ang nahisgutang pundo. (Gregg M. Rubio)

Suhol sa mga EO gikan LGUs gidili na

Gidili na ang paghatag sa mga lokal nga kagamhanan og suhol ngadto sa mga Election Officers nga nadestino sa ilang lungsod ug siyudad.

Kini ang pahimangno sa Commission on Audit human ilang nasuta nga ang lungsod sa Balamban ug Asturias nihatag og P55 mil ug P36 mil ngadto sa ilang Election Officers niadtong 2013. Ang COA miingon nga ang mga Election Officers dili apil sa mga nasudnong opisyal sa gobyerno nga hatagan og honorarium sa mga lokal nga kagamhanan.

Ang hatagan mao lang ang mga piskal, huwis, clerks of courts, fire marshall, hepe sa kapolisan, municipal government operations officer sa Department of Interior and Local Government ug mga magtutudlo sa pangpublikong tunghaan.

Nunot niini gimandoan sa COA ang lungsod sa Balamban ug Asturias nga ipakolekta ang nahatag nga bayad ngadto sa ilang Election Officers ug ipahunong na ang pagpahatag niini. (BANAT NEWS)