Duha gipamusil, usa gidakdaka’g bato

CEBU, Philippines - Duha ka lalaki gipamusil ang usa gibundakan pa og bato ang ulo diha sa lungsod sa Pinamungajan, pasado alas-12 sa kaadlawon kagahapon.

Giila ang namatay nga si Anthony Alferez , 35, samtang naangol si Jay Candoli, 20, pulos taga Barangay Lamak sa mao gihapong lungsod.

Matud pa ni PO1 Mark Gorres, desk officer sa Pinamungajan Police Station nga nahinabi sa Banat News nga gikan nagduwa og basketball sa Barangay Cabiangon ang mga biktima ug samtang nagpaabot sa mga kauban kalit silang gipamusil  sa usa ka Macnomel Deguinon.

Wala pa matagbaw ang suspetsado, mikuha pa kini og daku nga bato ug gibundak sa ulo ni Alferez ug dali nga mipalayo. Nakuha sa kapulisan sa crime scene ang duha ka basiyo sa kalibre .45 ug ang bato nga susama kadako sa bola sa volleyball. Napakyas ang kapolisan pagdakop sa suspetsado ug wala pa matino kung unsay motibo sa maong krimen. (/EIM)(BANAT NEWS)