May laing masuso nga gi-plasteran

CEBU, Philippines - Wa pa gani mahuman ang isyu sa Cebu Puericulture and Maternity House , duna na say laing hulagway sa usa ka masuso kansang baba giplasteran usab ug nagtutoy pa sa usa ka pacifier ang mikatap karon sa social networking site nga Facebook.

Sa Facebook account sa usa ka inahan, makita ang hulagway sa iyang anak nga duha pa ka adlaw niadtong higayuna nga giplasteran ang baba ug adunay tsupon nga gium-om niini.

Sa phone interview ngadto sa inahan sa maong masuso, kini mibutyag nga normal ang iyang anak apan gibutangan kini og oxgyen tungod kay maglisod pa og ginhawa. Tungod sa tubo sa oxygen maglisod kini sa pagpatutoy hinungdan nga gihatagan kini og pacifier ug gigamitan og plaster aron di kini matangtang.

Hinuon di pa kasulti ang Department of Health -7 kun aduna bay sayop sa maong mga hulagway kay magdepende kini sa sitwasyon.

Apan ang inahan sa masuso miingon nga naaghat siya sa pag-post niini tungod sa pag-deny sa Maternity Hospital nga di sila tiggamitan og plaster sa baba sa mga masuso.

Hinuon ang nakontrobersyal nga nurse sa maong tambalanan atol sa pagtambong niini sa inter-agency conference sa milabay’ng semana, miklaro nga mogamit sila og pacifier ug plaster kung may kamandoan sa mga doktor.

Gipasabot sa inahan sa masuso nga di niya gusto og gubot, buot lang niya nga di kini mahitabo pa sa ubang bata nga gipang-plasteran ang baba.

Si Atty. Cornelio Mercado, ang legal counsel sa Maternity Hospital nagkanayon nga sayon ra kaayo ang pag-post og picture sa Facebook, gikwestyon usab niya kun ngano karon pa kini mi-post nga Pebrero pa diay kini nanganak. Ilaha hinuon susihon kung unsay ilang mahimo kabahin niini. (/EIM)(BANAT NEWS)