Taga Sibonga suporta kang Davide
CEBU, Philippines - Nipadayag sa ilang suporta sa mga programa ni Gob. Hilario Davide III ang mga kapitan sa lungsod sa Sibonga. Apan giklaro ni Mayor Lionel Bacaltos nga wala nagpasabot nga nibali na sila og partido.
Si Davide ang pangulo sa Liberal Party sa probinsiya sa Sugbo samtang si Bacaltos sakop sa Alayon Party nga kaalyado sa One Cebu Party sa niaging eleksiyon.
"Number one gyud namong pag-anhi diri (sa Kapitolyo), kami sa among lungsod sa Sibonga musuportar na mi sa programa sa atong gobernador unya musuportar na sad mi sa administrasyon sa 2016 kang gobernador," matud ni Bacaltos.
Matud ni Bacaltos nga maoy nasabutan sa mga mayor sa unang distrito ang pagsuporta kang Davide.
Si Davide sa iyang bahin miingon nga dili kinahanglang mobali ug ang importante ang suporta sa iyang programa alang sa kaayuhan sa katawhan.
Dugang ni Bacaltos nga pagkakaron si Davide lang una ang ilang suportahan kay nakita nga maayo ang pagkadala sa probinsiya sa Sugbo.
Ang lungsod nakaangkon og P2 milyones gikan sa Kapitolyo alang sa pagpatukod sa sports complex. (/GMR) (BANAT NEWS)
- Latest
