Korean ug Norwegian gikawatan, suspek nasikop

CEBU, Philippines - Duha ka langyaw ang nabiktima sa pagpangawat niadtong Sabado diha sa managlahing lugar sa dakbayan sa Sugbo.

Si Shin hyun Wook, 33, Korean national kasamta-ngang nagpuyo sa Barangay Basak, dakbayan sa Lapu-Lapu nangayo og panabang sa kapolisan sa Waterfront Police Station mga ala-una sa kadlawon sa maong adlaw human giingong gikawat ang iyang cellphone nga nagkantidad og P30 mil nga gibutang niya diha sa driver seat sa iyang kotse nga giparada niya diha sa lugar.

Sa follow-up operation sa kapolisan nasikop si Jomarie Glepa Eluna, 18, taga Sitio Sandayong, Barangay Buhisan, dakbayan sa Sugbo kinsa giingong miangkong maoy mikuha sa nahisgutang butang ni Wook. Ang cellpone ni Wook giingong giprenda kini sa suspetsado og P1,500 ug giingong na-recover gikan sa giprendahan niining si “Arnold” nga silingan sa suspetsado.

Laing biktima mao ang Norwegian national nga si Olsen Helge Ole, 48, temporaryong nagpuyo diha sa usa ka hotel nga nahimutang dalan Pelaez, dakbayan sa Sugbo kinsa nawagtangan sa iyang P10 mil nga kwarta ug visa card.

Ang suspetsado sa pagpangawat mao sila si Stella Muñoz, 36, ug Heide Rose Miñoza, 30, parehong taga dalan M. Velez, Barangay Capitol Site, dakbayan sa Sugbo.

Ang maong mga babaye gikainom kini ni Ole sa milabay’ng gabii diha sulod sa iyang kwarto sa hotel.  Sa follow-up nga operation sa kapolisan nasikop ang mga suspetsado ug nagtingkagol karon sa Carbon Police Station detention cell. (BANAT NEWS)