Tulo ka tawo gipangpusil, nangaangol

CEBU, Philippines - Tulo ka tawo ang angol, usa kanila kritikal ang kahimtang, sa duha ka managlahi nga pagpamusil nga nahitabo sa dakbayan sa Sugbo kaniadto’ng Sabado.

Ang mga biktima mao sila si Marcelino Quezon, 42, ang iyang pag-umangkon nga si Shane Luiz Grandson, 19, pareho nga taga dalan C. Padilla, Barangay Mambaling ug ang ikatulo mao si Ramsey Opsima, 18, minyo ug nagpuyo sa Englis V. Rama Avenue, Barangay Guadalupe, Cebu City. Si Opsima gipusil gamit ang pugakhang kon hinimo-himo nga shotgun mga alas siete sa gabii kaniadtong Sabado. Dali kini nga gidala sa Vicente Sotto Memorial Medical Center (VSMMC) tungod sa samad sa tiyan.

Matud pa ni homicide investigator Ruth Violango nga adunay mga nakatug-an nga ang suspetsado nga mipusil ni Opsima mao ang usa ka Elymar Ancajas, 20, taga dalan Andres Abellana, Barangay Guadalupe.

Si Opsima ug Ancajas pareho nga tighugas og mga sakyanan daplin sa V. Rama Avenue. Matud pa nga ang pagpamusil naggumikan sa dugay na nila nga bikil ug nausban niadtong Sabado sa gabii. Wala dayon madakpi sa kapolisan si Ancajas. Pagka alas-11 sa gabii, sila na usab si Quezon ug Grandson ang gipangpusil gawas sa ilang panimalay sa dalan C. Padilla, sakop sa Barangay Mambaling.

Sa imbestigasyon nasayran nga samtang nagsultihanay ang duha sa gawas sa ilang balay, kalit lang usa ka motorsiklo nga dunay sakay nga duha ka lalaki ang miabot ug kalit lang mipusil kanila.

Si Quezon nakaangkon og pinusilan sa iyang wala nga bahin sa lawas, tiyan ug tiil, samtang si Grandson nasamdan usab sa iyang paa. Matud ni Violango nga wala usab maklaro sa mga biktima ang panagway sa duha ka lalaki tungod kay ngitngit ang bahin sa maong lugar nga nahitaboan sa pagpamusil. (BANAT NEWS)