Driver sa getaway motorcycle sa mipatay sa negosyante nadakpan

CEBU, Philippines - Nadakpan sa hot pursuit operation sa kapolisan ang drayber sa motorsiklo nga giluwanan sa kriminal nga nagpusil patay sa usa ka negosyanteng babaye nga miangol usab sa drayber sa traysikol ug pasahero niining lalaki niadtong Biyernes sa hapon.

Ang nadakpan mao si David Bolabola Llanto alyas Dave, 35, nagpuyo kaniadto sa Cahipa, Barangay Hipodromo, dakbayan sa Sugbo apan  nagpuyo na karon sa Sitio Baybayon, Barangay Mantuyong, dakbayan sa Mandaue.

Gipangita pa usab ang kauban niini nga naila lang sa pangalan nga Ongod nga maoy giingong triggerman sa biktimang si Imelda Tio Yu,44, taga Maguikay, ug anak sa tag-iya sa usa ka furniture ug textile company.

Si Senior Inspector Jimmy Portes, hepe sa Investigation Detection and Management Branch (IDMB) sa Mandaue City Police Office (MCPO) maoy midakop kang  Llanto sa Mantuyong niadtong Sabado sa hapon kinsa ilang nakuhaan og armas nga kalibre .38 nga adunay lima ka mga bala.

Matud pa ni SPO3   Marcos Noval Jr.   sa  IDMB  nga positibo g’yud nga giila sa mga saksi si Llanto nga maoy nagmaneho, nailhan nga Ongod maoy nagpusil patay kang Imelda Tio Yu, 44 anyos nga taga Holy Family, barangay Maguikay, dakbayan sa Mandaue.

Gitug-an sa  mga nakasaksi sa maong pagpamusil nga si Ongod ug Llanto kanunay na nilang masigpatan nga magkuyog sa maong dapit hinungdan nga nailhan nila ang duha.

Ipaubos sa ballistic test ang armas nga ilang nasakmit kang Llanto aron susihon kun mao ba kini ang armas nga gigamit sa maong pagpatay.

Gidudahan nga sinuholan ra ang duha ug adunay mastermind nga maoy nagsugo kanila.

Naangol usab sa maong pagpamusil si Arnel Sedillo Juanite, 31,kasakay ni Yu ug ang drayber nga si Roger Calumba kinsa anaa karon sa Vicente Sotto Memorial Medical Center sa dakbayan sa Sugbo. (BANAT NEWS)