Nanglugos sa ig-agaw gidakop

CEBU, Philippines - Gidakop sa kapolisan ang usa ka lalaki nga gireklamo’ng milugos sa iyang ig-agaw’ng babaye samtang natulog ang biktima sulod sa apartment sa dalan Sanciangko, dakbayan sa Sugbo kaniadto’ng Biyernes sa kaadlawon.

Ang suspek nga anaa karon sa bilanggoan sa Parian Police Station mao si John Ray Lanzaderas, 22, lumad nga taga dakbayan sa Tagbilaran, Bohol.

Mireklamo ang inahan sa biktima ngadto sa kapolisan human nga ang iyang anak nagpatabang kay gilugos siya sa suspek mga alas dos sa kaadlawon.

Ang mga polis miresponde dayon sa apartment ug gidakop si Lanzaderas. Matud sa biktima nga samtang siya natulog sulod sa lawak nakabantay siya nga adunay mihikap sa iyang pribadong bahin sa lawas.

Dayon nabatyagan sa biktima nga adunay misulod sa pribado’ng parte sa iyang lawas. Nakit-an sa biktima nga ang iyang ig-agaw diha sa iyang tupad apan ang kamot niini didto sa iyang bilahan.

Dihang nakabantay ang iyang ig-agaw nga nakamata na ang biktima dali kini nga mibangon ug milakaw paingon sa pikas kwarto. Ang biktima midagan padulong sa iyang inahan ug mitaho sa nahitabo.

Ang biktima gidala sa pink room sa Vicente Sotto Memorial Medical Center aron mahimoan og physical ug psychological examination. Ang kapolisan nag-andam na og kaso nga Rape in relation to child abuse nga ipasaka batok ni Lanzaderas.   (BANAT NEWS)