Mobile hospital planong mugnaon sa mga negosyante
CEBU, Philippines - Ang mga kalamidad nga miigo sa nasud maoy nakaaghat sa mga negosyante lukop kalibutan nga momugna og mobile hospital aron magamit kini isip pagpangandam sa mga katalagman nga moigo unya sa nasud.
Kini maoy usa sa mga natuki sa gipahigayong World Economic Forum nga maoy unang higayon nga gihimo dinhi sa Sugbo.
Ang tag-iya sa Movenpick Hotel nga si Manny Osmeña mibutyag nga mopasiugda siya og Disaster Response Medical Program nga nagkantidad og 10 million US dollars.
Nasayran nga human sa iyang gihimong batbat atubangan sa mga delagado sa forum adunay mga negosyante nga mipasalig kaniya nga mosuporta sa iyang tinguha.
"After I spoke, I already have a few people that came forward internationally that they are ready to support or link us to people who will support the program." sumala ni Osmeña.
Di mominus sa 30 ka mga state-of the-art hospital trucks ang ilang planong maangkon nga kompleto sa mga kahimanan nga magamit panahon sa emerhensiya. Hinuon wala mobutyag si Osmeña kun kanus-a kini matuman.
Samtang sa iyang bahin, ang chairman sa Ocean 14 Summit nga si Winston Damarillo mibutyag nga ang kalihukan gi-organisa sa komunidad sa World Economic Forum sama sa young global leader, global shapers ug uban pa.
Gihulagway ni Damarillo nga dako og tabang ang maong kalihukan tungod kay mahatagan og kahigayonan ang mga negosyante sa WEF nga makigtambayayong sa mga local leaders sa Sugbo. (BANAT NEWS)
- Latest
