Nganong pirmi mapugahan ang Consolacion PNP?

CEBU, Philippines - Ang hepe sa Cebu Provincial Intelligence Branch (PIB) miawhag sa hepe sa Consolacion Police Station nga mopasabot kun ngano nga ang iyang police station kanunay lang mapugahan og piniriso.

Si PIB Chief Rodolfo Albotra mihimo sa pamahayag human nga kaniadto’ng Martes may lain nga piniriso sa Consolacion PNP nga nakalayas apan hinuon nadakpan ra pagbalik ug gitugyan na sa Provincial Jail.

Matud ni Albotra nga ilang paabuton ang tubag ni Senior Inspector Franco Oriol kun ngano nga kanunay lang adunay makapuga sa Consolacion Police Station.

Hayan mag-atubang og imbestigasyon si Oriel apil ‘sab ang polis nga gipugahan nga si PO1 Robert Jimenez.

Si Oriol nangatarongan nga ang pagpuga naggumikan sa kakaraan ug kahuot sa ilang prisohan mao nga sayon ra kini eskapohan sa mga binilanggo.

Atol sa pagbundak sa kusog nga ulan kaniadto’ng Martes ang piniriso nga si Lester Alfornon nga nabilanggo sa pagpangawat mipuga agi sa atop apan nasikop ra sa follow up operation. Duna ‘say piniriso nga nakaeskapo kay gitugotan nga makagawas aron makapatotoy sa iyang anak. (/RUB)(BANAT NEWS)