Pag-ayo sa gubaon’g tunghaan ipadayon bisan magklase na
CEBU, Philippines - Dakong opisyal sa Department of Education mianhi pagtuyo sa Sugbo ug nakigtagbo sa kadagkoan sa DepEd aron mapangitaan og pamaagi nga ilang matuman ang target pagtukod og daghang tunghaan.
Si DepEd Assistant Secretary Rey Laguda miingon nga gawas sa pagtukod og daghang tunghaan, apil sa ilang proyekto mao ang pag-ayo sa mga nangaguba nga tunghaan tungod sa bagyo’ng Yolanda.
Matud ni Laguda nga nagtagana sila og P40 milyones nga pundo alang sa clean-up process sa mga tunghaan sa tibuok nasud. Gani nangita karon ang DepEd og mga tulda nga himoo’ng temporaryo nga classrooms samtang wala pa mahuman ang pagtukod sa mga tunghaan.
Dul-an sa 200 ka transitional classrooms ang ilang nadawat gikan sa Philippine Red Cross. Tinguha sa DepEd nga makatukod og kapin 2,000 ka bag-ong classrooms.
Gipaniguro sa DepEd nga ang mga tunghaan nga ilang pagatukoron lig-on ug dili dali nga maguba sa linog ug sa bisan unsa nga kalamidad sama sa bagyo.
Subli nga gipasalig sa DepEd nga bisan kung magsugod na ang klase karong Hunyo 2 magpadayon gihapon ang ilang pag-ayo ug pagtukod sa mga tunghaan. Matud ni Laguda nga andam na ang DepEd sa pagbukas sa klase.
Nangayo hinuon og pagsabot ang DepEd sa publiko kun adunay ginagmay nga problema nga motumaw tungod sa problema nga gipangitaan nila og sulbad pagka karon aron mahibalik sa normal ang kahimtang sa mga tunghaan.
Gipasalamatan sa DepEd ang tanang misuporta paghatag og donasyon aron hinay-hinay nga makabangon ang mga lugar nga apektado sa katalagman. (/RUB)(BANAT NEWS)
- Latest
