Power shortage sa CV red alert na, apan Cebu dunay igong kuryente

CEBU, Philippines - Mipadayag si Gob. Hilario Davide III nga natagbaw siya sa report sa power sector kabahin sa kahimtang sa power supply sa Sugbo atol sa ilang pulong kagahapon.

"I was satisfied of what transpired sa meeting with power sector," sigon sa gobernador.

Ang National Grid Corporation of the Philippines (NGCP) miingon nga kuwang ang supply sa kuryente sa tibuok Visayas apan dili ingon niini kagrabe ang problema sa supply sa Sugbo tungod kay duna kini reserba gikan sa Luzon.

Malaumon hinuon si Davide nga dili magdugay ang power shortage kay mobalik na sa operasyon karong adlawa ang napawong nga planta sa Cebu Energy Development Corporation (CEDC) sa Toledo City ug ang Panay Energy Development Corporation sa Panay Island nga nagsuplay usab sa Sugbo.

Usa sa maayong inisyatiba nga gipatuman karon sa Sugbo mao ang Interruptible Load Program (ILP) nga gipatuman sa Visayan Electric Cooperation (VECO) ug gusto ni Davide nga ang tanang local government units mopatuman niini inabagan sa Energy Regulatory Board (ERC).

Ang ILP nagmando sa tanang dagkong establisamento o kompanya nga dunay kaugalingong mga generator sets gamiton kini panahon nga dunay kakulang sa supply sa kuryente aron magamit ang supply gikan sa VECO ngadto sa ubang konsumidor nga way mga generators.

Duna sab plano ang gobernador nga magpatawag balik og pulong sa mga power sector karong umaabot nga Hunyo aron hisgutan ang mga long-term plan kabahin niini. (/EIM)(BANAT NEWS)