People’s Initiative kontra pork barrel gitinguha

CEBU, Philippines - Ilusad sa nagkalain-laing sector sa nasud ang people’s initiative batok pork barrel aron hingpit na kining mawala kay gihulagway kini nga maoy tinubdan sa kurapsyon sa Pilipinas.

Nahimong sentro karon ang Priority Development Assistance Fund (PDAF) o mas naila nga pork barrel tungod sa P10 bilyones nga giingong nabulsa ra sa mga magbabalaod nga gipaagi sa mga bogus nga non-governmental organization (NGO) sa gitanggong nang negosyanteng si Janet Lim Napoles.

Ang tigpamaba sa Coalition Against Pork Barrel System, Atty. Rex Fernandez, miingon nga aduna sila’y iduso nga balaudnon nga ipaagi sa people's initiative ang pagpatangtang na sa hingpit niining pork barrel.

Si Fernandez mibutyag nga unod sa maong balaudnon mao ang pag-abolish sa pork barrel ug ang tanang disbursement ug appropriations sa kwarta sa gobiyerno magsubay sa balaod.

Nasayran nga tinguha nila nga bisitahon ang tanang legislative districts aron makuha nila ang diyes porsiyento sa populasyon nga mopirma kay mao gikinahanglan aron mamahimong balido ang people’s initiative subay sa Konstitusyon.

Gipadayag ni  Bayan Muna Representative Carlos Zarate nga sa pagkatinuod, wala pa gyud hingpit nawagtang ang pork barrel kay igo ra kining giilisan og laing  ngalan.

Matud niya mas daghang kaayuhan nga makuha ang kadaghanan kun hingpit nga wagtangon ang pork barrel sa mga magbabalaod. Si Cebu Archbishop  Jose Palma mibutyag nga panahon na aron magamit sa sakto ang buhis sa katawhan ug ang people's initiative maoy usa sa pamaagi aron makab-ot ang maong tinguha. (/EIM)(BANAT NEWS)