Korean suspect ug ugangan dili maayo’g relasyon — LCPO

CEBU, Philippines - Gikatakdang pasakaan og kasong parricide ug double homicide ang   Koreano nga gituohang mipatay sa iyang asawa ug sa iyang mga ugangan sud mismo sa ilang gipanag-iyang kan-anan sa sitio Bagong Bayan, Barangay Maribago sa dakbayan sa Lapu-Lapu sa miaging adlaw.

Matud pa ni PO3 Lydo Pinos sa Homicide Section, base sa ilang pag-imbestigar walay kalambigitan ang away sa negosyo kay maayo ang dagan sa ilang restaurant nga mao ang Han Ga Wi Restaurant.

Personal ang nakitang motibo sa maong krimen dihang gipatay sa suspek nga si Kim Se Wong ang iyang asawa nga si Young Mi An ug sa mga ugangan niini nga sila si Kim Soon Ok ug Ho An diha sa sud sa ilang restaurant.

Ang mga higala sa mga biktima mibutyag nga di maayo og relasyon si Wong sa iyang asawa ug sa mga ugangan. Si Wong wala pa kakuhai og pamahayag hangtud ning pagbalita gumikan kay kritikal pa ang kahimtang niini human nga giingong naglaslas sa duha niini ka pulso human sa maong krimen.

Ang guwardiya nga si Jun Eborda nakadungog sa kaguliyang sud sa maong restaurant sa milabay’ng alas 2:35 sa kaadlawon.

Base sa entry sa logbook ni Eborda, mga alas 2:30 sa kaadlawon iyang nabati ang siyagit ug hilak gikan sa sud sa restaurant apan nahilom kini.

Alas -5 na sa milabay’ng hapon napalgang patay ang  mga biktima nga dunay mga dinunggaban ug binunalan sa lawas ug ulo sud sa maong restaurant.

Ang Criminal Investigation and Detection Group 7 (CIDG) makig-alayon sa LCPO sa pag-imbestigar sa maong kaso matud pa ni Police Superintendent Fermin Armendares, ang Deputy Regional Chief sa maong buhatan. Ang presidente sa Korean Association sa Sugbo nga si Charlie Cho ang mipaabot sab sa iyang mensahe pinaagi sa usa ka text message, diin iyang gikasubo ang nahitabo sa ilang mga kaubanan.(/EIM)(BANAT NEWS)