Delivery truck gitulis

CEBU, Philippines - Gitulis sa duha ka sakay og motorsiklo ang ahente sa softdrinks samtang nag-deliver sa produkto sa lungsod sa Pinamungajan.

Ang ahente ug drayber sa delivery truck nailhan nga si Randy Jano, 25, ulitawo, taga Bato, dakbayan sa Toledo.

Kuyog ni Jano ang tulo ka helpers nga sila si Milfred Manibang, Ricky Sayco ug Robert Elacio, pulos taga Negros Occidental.

Matud pa ni PO1 Romelo Lawas sa Pinamungajan Police Station nga gikan sa dakbayan sa Toledo ang delivery truck ug pag-abot sa Pandacan, Pinamungajan, usa ka motorsiklo nga TMX nga dunay sakay nga duha ka lalaki nga nag- helmet ang kalit lang mition og pistola ni Jano.

Ang mga helpers wala’y nahimo samtang didto ibabaw sa delivery truck nga nagpakanaug sa mga softdrinks.

Nakuha sa mga tulisan ang dili mominos sa P30 mil nga halin ug daling misibat paingon sa dakbayan sa Toledo.

Pakyas ang kapolisan sa Toledo sa ila gihimong road block.

Samtang usa ka sales distributor sa Universal Robina Corporation ang gikawatan sa reserbang ligid sa iyang Toyota Hilux samtang nag-parking sa usa ka kan-anan sa dakbayan sa Toledo.

Ang biktima mao si Eduardo Quiros, taga Nueva Ecija apan kasamtangang nagpuyo sa usa ka pension house sa dakbayan.

Gibana-bana nga di mominos sa P5 mil ang kantidad sa maong gikawat nga ligid.  (BANAT NEWS)