Tulo ka Koreans gipatay, ang usa angol

CEBU, Philippines - Tulo ka Korean nationals nangamatay ug laing usa ka Koreano ang naangol ug anaa pa sa tambalanan human sila nag-away sulod sa gipanag-iya nila nga Korean restaurant sa Barangay Maribago, dakbayan sa Lapu-Lapu kagahapon sa hapon.

Sa pagbuhat niini’ng balita wala pa mailhi ang mga namatay nga didto pa nagbuy-od sulod sa restaurant samtang nagpaabot sa mga sakop sa PNP Scene of the Crime Operation (SOCO) nga makahiling sa ilang mga lawas.

Ang namatay mao ang duha ka Koreana ug usa ka Koreano, samtang laing Koreano ang gidali paghatud sa tambalanan nga samaron.

Nahitabo ang kagubot sulod sa Han Ga Wi Restaurant sa Sitio Bagong Bayan, Barangay Maribago, dakbayan sa Lapu-Lapu mga alas singko sa hapon.

Matud ni PO1 Joe Mari Villar, sakop sa Tourist Police, ilang nahibaw-an gikan sa guwardiya nga si Sharon Inting sa D’ Ranger Security Agency nga misulod ang upat ka Korean nationals sa ilang gipanag-iya nga restaurant kagahapon sa kadlawon ug nahibulong sila nga wala kini manggawas.

Nadiskobrehan na lang nga nangamatay na ang tulo kagahapon sa hapon.

Nasuta ni PO1 Villar ang ang tulo ka patay nga Korean nationals adunay mga samad agi sa binunalan sa ilang mga ulo nga maoy hinungdan sa ilang kamatayon.

Samtang gisubay nila ang dugo sa hagdanan ug ilang nadiskobrehan nga adunay usa ka lalaki’ng Korean national nga buhi pa apan samaron ug mitago sa kuwarto sa ikaduha’ng andana sa restaurant.

Ang guwardiya miasoy nga kanunay maglalis ang maong mga Koreano tungod sa ilang negosyo nga ingon sa nagkahinay.

Hangtod sa pagsuwat niini’ng balita ang kapolisan padayon pa nga nag-imbestigar sa hitabo. (BANAT NEWS)