Salisi mousab pa unta nadakpan tungod sa CCTV

CEBU, Philippines - Apo sa mayor sa Iligan City ug board member sa Lanao del Norte nabiktima sa Salisi gang sulod sa usa ka mall apan ang suspek  nasakpan  tungod sa kuha sa closed-circuit television camera sa maong mall dihang mibalik kini sa maong dapit aron mamiktima na usab.

Nasikop sa mga house detectives ang suspek nga si Glemar Mier, 21, taga Sitio Kamagong, Barangay Lahug ning dakbayan sa Sugbo ug nabawi kaniya ang mga gipangkawat nga mga butang sa follow up operation sa Theft and Robbery Section. Ang biktima mao ang16-anyos nga taga Tambacan, Iligan City ug nag-check in sa usa ka hotel diha sa Barangay Luz, Cebu City.

Sumala pa nga nag-order sa ilang pagkaon ang biktima ug gibilin niini iyang sling bag nga duna’y sulod nga Samsung tablet ug mga ID’s diha sa ilang lamesa aron dili malingkoran og lain.

Apan sa ilang pagbalik nawala na ang iyang bag hinungdan nga nagpatabang sila sa security personnel ug nakita sa CCTV ang usa ka lalaki nga mikuha sa maong bag, apan nakagawas na kini sa mall.

Nianang pagka-alas otso na sa gabii nabantayan sa house detectives ang suspetsado nga mibalik sa mall mao nga ilaha kining giimbitar ug gipahibalo ang TRS. Miangkon kini sa salaod ug nauli ang butang. (BANAT NEWS)