Priso mieskapo kay gimingaw

CEBU, Philippines - Usa ka piniriso sa Consolacion Police Station ang  mieskapo tungod sa kamingaw niini sa iyang pamilya ug kahadlok sa kasong iyang giatubang.

Kini maoy rason sa mieskapong si Lester Alfornon, taga Landing, Catarman, Liloan kini nag-atubang og kasong pagpangawat human nadakpan niadtong Mayo 18 ug mieskapo pagka Mayo 20 atol sa pagbunok sa uwan.

Si Alfornon nadakpan hinuon dayon inabagan sa kapolisan sa Danao ug mga silingang lungsod.

Apan ang hepe sa Consolacion Police Station nga si Senior Inspector Franco Rudolf Oriol mibasol sa kahuot ug kakaraan na sa ilang prisohan maong sayon-sayonon ra kini pag-eskapo sa mga inmate.

Si Alfornon anha milusot sa atop ug mipauli sa ilaha. Natunong usab nga gi-deploy ang mga polis nianang tungora sa usa ka barangay nga nagsaulog sa ilang pista maong wa kaayo mabantayi ang iyang pag-eskapo.

Tungod sa maong problema buot ni Oriol nga magtukod og bag-ong karsel alang sa mga piniriso.  (BANAT NEWS)