Otso anyos nga bata nalumos patay

CEBU, Philippines - Patay ang otso anyos nga bata human nalumos sa dagat sa Caohagan, isla sa Olango, dakbayan sa Lapu-Lapu alas dos pasado niadtong Martes.

Si PO3 Winston Ybañez sa homicide section sa kapolisan sa maong dakbayan miingon nga kuyog sa iyang ig-agaw nga naligo sa dagat ang biktima nga si Vincent  Russel Arranguez.

Samtang naligo maoy namatikdan sa iyang inahan nga didto na sa lawom nga bahin sa nahisgutang lugar nagkapakapa ang biktima hinungdan nga dali kini nilang gitabang.

Matud ni Ybañez nga dali unta nga gihatud ang biktima sa Santa Rosa District Hospital apan gideklarar kini sa mga doktor nga dead on arrival. Sa laing bahin grabeng pagkaangol sa 35 anyos nga lalaki human gidunggab sa iyang maguwang sa sitio Bagong Bayan, Maribago, dakbayan sa Lapu-Lapu alas dos pasado kagahapon sa hapon.

Ang biktima mao si Tommy Pangatungan ug ang suspetsado nga iyang maguwang mao si Alex Pangatungan, 44, ulitawo nga nagpuyo sa maong dapit.

Matud ni Ybañez nga nagkalalis ang managsoon labot sa problema nga naglambigit sa ilang pamilya ug ang suspetsado nga wala na makapugong kalit lang midunggab sa kilid sa biktima ginamit ang kutsilyo.

Daling gidala sa mga sakop sa pamilya ang biktima sa Vicente Sotto Memorial Medical Center sa dakbayan sa Sugbo ug ang suspetsado dali usab nga nakasibat pahilayo sa lugar. (BANAT NEWS)