Kapitolyo mobayad 100% insurance premium

CEBU, Philippines - Abagahon sa Kapitolyo ang siyento porsiyento nga bayranan sa insurance sa mga mag-uuma ug mananagat ubos sa Agri Fishery Insurance Program.

Ang hunta probinsiyal sa Sugbo nipasar sa resolusyon nga gipangamahanan ni Bokal Alex Binghay sa pagpatuman sa maong programa.

Tuyo sa Kapitolyo nga dili na mahasol ang mga siyudad ug kalungsuran sa paghatag sa tampo nga 10 porsiyento human nasuta nga gamay ra ang niapil sa programa sanglit walay ikatampo ngadto sa lalawigan kinsa niabaga sa 90 porsiyento.

Sa taho sa Philippine Crop Insurance Corporation gikan sa Enero hangtud Abril 30 ning tuiga, pito lang ka lokal nga kagamhanan ang niapil sa palay production insurance, unom sa mais, napulo sa panghayopan, 11 sa fishing boat ug 20 sa accident dismemberment security scheme (ADSS) gikan sa 51 ka siyudad ug lungsod sa lalawigan sa Sugbo.

Ang Kapitolyo adunay P8 milyones nga gahin apan P391,232 lang ang nagamit.

Matud sa kasamtangang hepe sa Provincial Agriculture Office, Roldan Saragena, ang interesadong mopa-enrol sa programa moadto lang sa ilang Municipal Agriculturist o Municipal Agriculturist Officer.

Ang matag miyembro makadawat og P57,000 diin P50,000 sa pagkamatay, P2, 000 sa pagpalubong ug P5, 000 alang sa medikal.

Ang programa gisugdan niadtong Hulyo 2011 ug gibanabanang dunay kapin 100,000 na ka mga mag-uuma sa tibuok probinsiya sa Sugbo ang napa-enrol. (BANAT NEWS)