Gitangtang nga mga kawani sa USC nagwelga

CEBU, Philippines - Nabalda ang summer class ug enrolment sa University of San Carlos-Talamban campus human nipahigayon og welga ang mga gipangtaktak sa trabaho nga mga kawani sa General Services Office sa maong tunghaan.

Wala kasulod ang mga estudyante kagahapon sa buntag human babagi sa mga welgista.

Si Joverito Contratista, representante sa Associated Labor Union-Trade Union Congress of the Philippines (ALU-TUCP), mipasabot nga dili maki-angayon ang pagtaktak sa 168 ka kawani sa GSO kinsa ang uban miabot na sa 25 ka tuig ang serbisyo.

Ang pangulo sa grupo, Arnold Arcipe, miingon nga 22 na siya ka tuig nga nag- alagad sa maong tunghaan ug daku kini nga epekto kaniya ug sa iyang kaubanan nga dunay pamilya nga gibuhi ug nagsalig lang sa maong trabaho.

“Lisud gyud kaayo sir kay wala na dayon mi trabaho ani, upat pa ka buok anak nako, mohangyo lang unta mi nga madungog ang among tingug,” matud ni Arcipe nga nahinabi sa Banat News.

Samtang dunay mga estudyante nga nisuporta sa kawsa, may pipila gikan sa layong lugar ang nagbagulbol kay wala makapa-enrol gumikan sa welga. Ang legal consultant sa USC, Fr. Ernesto Lagura, nipasabot nga ang pagtangtang sa mga trabahante nahisubay kini sa balaud.

Pagdaginot sa gasto ang nag-unang rason sa pagpanaktak sa trabahante.

“Sa among gihimo nga study, pwede man gud nga amoa na lang nga i-outsource ang GSO para makamenos mi sa gasto, naghatag mi og sakto nga panahon ug daghan man pud ang midawat sa bayad, it is the privilege and the right of the management nga mangita og asa siya makamenos og gasto,” matud ni Lagura.

Dugang ni Lagura nga abli ang ilang buhatan nga makig-estorya sa mga nagwelga aron mahatag pa ang ilang gusto nga pangayoon nga bayad apan dili na sa pagbalik sa ilang trabaho. (BANAT NEWS)