Pardo Police Station ibalhin kay di presentable

CEBU, Philippines - Gikatakdang ibalhin og laing lokasyon ang Pardo Police Station nga gibutang karon sa Pardo Public Market tungod kay di presentable ug naghuot lang ang mga butang.

Atol sa ocular inspection ni acting mayor Edgar Labella sa Pardo Police Station kagahapon gihulagway niyang dili maayo ang sitwasyon niini diha sa sulod sa merkado.

Gani, ini’g abli pa lang sa pultahan sa maong estasyon sugaton dayon ang tawo sa detention cell. Anha na sa ikaduha nga andana makita ang chief station commander ug uban pang mga polis.

Dugang pa ni Labella nga mahulog na hinuon nga ang mga dinakpan ang nagbantay sa mga polis nga anaa sa ikaduha nga andana nahimutang. “Huot, and not conducive for an effective governance,” paghulagway pa sa bise mayor.

Tungod niini, si Labella miduol kang  Jose Ng sa Cebu Chamber of Commerce and Industry ug kini gikatahong misaad nga motabang sa tukorong police station sa Pardo nga anha ibutang sa atubangan sa Pardo Parish Church duol sa Bureau of Fire Protection Sub-Station.

Hinuon gipaandam na sa usa ka engineer  ang Program Of  Works and Estimates (POWE) ang  lugar alang sa balhinan sa maong police station.

Samtang mihangyo si Barangay Captain Lotlot Ignacio sa barangay Inayawan dakbayan sa Sugbo  atol sa Cebu City's Police Coordinating Advisory Council ( PCAC) meeting nga pabutangan og police  sub-station ang iyang barangay.

Tungod kay dako ang iyang barangay nga may kapin sa 30 mil nga populasyon ug daghan usab mga krimen ilabi na ang kabahin sa ginadili nga drugas nga kinahanglang mabantayan. (BANAT NEWS)