Labella miawhag sa mga ginikanan
CEBU, Philippines - Gitataw ni Acting Cebu City Mayor Edgardo Labella nga gawas sa pagpanglimpyo sa mga tunghaan ang mga ginikanan ug magtutudlo angay usab nga motan-aw sa seguridad sa mga tinun-an.
Matud ni Labella nga angay’ng atimanon sa mga magtutudlo ug mga ginikanan nga ang tunghaan adunay igo nga gidak-on sa hagdanan ingon man emergency exits nga magamit panahon sa dinaliang panginahanglan.
Gibisitahan ni Labella ang daghang mga tunghaan sa dakbayan kagahapon atol sa pagpahigayon sa Brigada Eskwela nga ang mga ginikanan mitabang pag-andam sa mga classrooms sa ilang mga anak.
Ang mga tunghaan nga gibisitahan ni Labella naglakip sa elementary schools sa Mabolo ug Guadalupe, City Central School ug uban pa.
Si Labella miingon nga angay’ng atimanon gayud ang mga pultahan ug hagdanan aron pagsiguro nga walay mga bata nga mangahulog panahon nga adunay emerhensya nga panghitabo.
Giawhag sa bise mayor ang kadagkoan sa mga tunghaan nga awhagon gayud ang mga ginikanan nga motabang sa pag-andam sa classrooms sa ilang kabataan aron magamit na pagbukas sa klase sa Hunyo 4.
Adunay ubang tunghaan dinhi sa dakbayan nga kuwang og hagdan nga magamit sa mga bata ug panahon nga adunay emerhensya posible nga mangahulog ang kabataan sa paglumbaanay. (/RUB)(BANAT NEWS)
- Latest
