Nahadlok nga panimaslan
CEBU, Philippines - Kadtong nadakpan nga ika-walo nga most wanted sa listahan sa Cebu City Police Intelligence Branch mitug-an nga wala siya mosurender kay nahadlok siya nga patyon.
Si Patrick Daclison, 25, gipaatubang sa mga tigbalita kagahapon human siya madakpi kaniadtong Mayo 17 didto sa Barangay Lahug.
Upat ka tuig ang pagtago-tago ni Daclison hangtud nga siya nadakpan sa mga polis.
Matud ni Daclison nga nahadlok g’yud siya nga bawsan sa pamilya sa iyang napatay nga si Jose Jermel Sabredo niadtong tuig 2010 didto sa ilang barangay sa Sawang Calero.
Si Daclison miingon nga nadawat niya ang impormasyon nga nangita kaniya ang pamilya sa iyang napatay ug gusto kini nga mobalos kaniya.
Sa iyang kahadlok, didto siya mitago sa Valencia, Bukidnon sulod sa pipila ka tuig aron makalikay sa pamilya sa iyang napatay.
Wala hinoon nagdumili ang dinakpan sa pag-angkon sa iyang nahimo nga salaod ug matud pa nahimo niya kadto isip paglaban lang sa iyang ig-agaw nga maoy gikaaway sa iyang napusilan niadtong 2010.
Si Supt. Romeo Santander, hepe sa City Intelligence Branch mikonpirmar nga diha nga ila nang nasikop si Daclison mihangyo gyud kini nga protektahan sa kapulisan ug nangutana pa kung naa ba ang pamilya sa iyang napatay. (/RUB)(BANAT NEWS)
- Latest
