Sakyanan gi-clamp, driver natulog sa sulod

CEBU, Philippines - Kapin na sa 40 ka sakyanan ang na-clamp sa dakbayan sa Sugbo sulod lang sa niaging tulo ka semana.

Labing ulahing na- clamp sa mga sakop sa Cebu City Traffic Operations Management (CITOM) ang pito ka pribadong sakyanan nga nag-overnight parking samtang ang uban nag-parking sa mga “no parking zones” sa dalan Plaridel, Pelaez, Sanciangko, Borromeo ug Magallanes.

Samtang adunay mireklamo nga gi-clamp ang sakyanan Sabado sa gabii sa may dalan Magallanes atubangan sa usa ka restaurant. Matud pa sa tag-iya sa sakyanan nga nahibulong siya kung unsa ang iyang nalapas sanglit daghan ang nag-parking sa lugar isip usa ka pay-parking zone.

Ang nahisgutang sakyanan usa ka Ford ug mireklamo ang tag-iya sanglit gi-clamp ang sakyanan samtang anaa sa sulod ang drayber nga natulog. Wala usab makabantay ang guwardiya sa establisemento sa giparkingan tungod kay nakatulog usab kini.

Ang maong sakyanan kinanghalan gihapon nga i-clamp matud pa sa usa ka sakop sa CITOM tungod kay bisan pa usa ka pay-parking ang usa ka lugar, dili mahimong mag-overnight parking niini.

Nagdumili pagluwat og pamahayag si CITOM base control operator Alfredo Loresto mahitungod sa maong reklamo.

Ang City Ordinance 1664 kon ang Clamping Ordinance  nagmando sa pag-clamp sa mga sakyanan nga pataka lang og parking daplin sa kadalanan.

Tumong sa maong ordinansa nga dili himoong grahian ang daplin sa mga kalsada aron dali ra sa pag-agi sa mga emergency vehicles panahon nga dunay alarma. (BANAT NEWS)