Laing wanted nadakpan sa kapolisan

CEBU, Philippines - Human sa pipila ka tuig nga pagtago-tago, nadakpan ra g’yud sa kapolisan ang giila nga ikawalo nga labing pinangita nga kriminal base sa talaan sa Cebu City Police Office.

Ang nadakpan mao si Patrick Daclison, 25, ulitawo, lumad nga taga dalan Tupaz, Barangay Sawang Calero ug nag-atubang og kaso’ng murder, ug aduna’y patong sa ulo nga P150 mil.

Ang mga sakop sa City Intelligence Branch (CIB) nga gipangulohan ni SPO1 Raymond Supatan maoy midakop ni Daclison nga gihulagway nga idlas kaayo nga dakpon.

Ang hepe sa CIB nga si Superintendent Romeo Santander miingon  nga upat ka tuig na nga nagtago-tago sa Bukidnon ang suspek ug giingon nga usa ka semana pa lang kini nabalik dinhi sa Sugbo ug didto magtago sa hilit nga dapit sa Barangay Lahug.

Pinaagi sa nakuha sa impormasyon sa CIB, dali dayon nila nga gipanid-an ang maong lugar ug namatud-an nga didto g’yud ang wanted magtago mao nga ilang nadakpan.

Wala na makahigayon si Daclison pag-ikyas kay gilibotan na nila daan ang mga dapit nga iyang agianan.

Ang mga polis midakop ni Daclison base sa warrant of arrest nga giisyu ni RTC Branch 14 Judge Raphael Yrastorza Sr, sa kaso’ng murder.

Matud ni Santander nga si Daclison maoy ikalima na nga most wanted sa listahan sa CCPO nga adunay premyo nga gipatong sa iyang ulo tungod sa pagkaidlas dakpon.

Gipaabot nga karong adlawa si Daclison ipresentar ngadto sa huwes nga nag-isyu kaniya og warrant sa dili pa tanggongon sa Cebu City Jail. (BANAT NEWS)