Ngano’ng ang smoke belching vehicles wala masumpo

CEBU, Philippines -  Daghan ang nahibulong kun ngano nga bisan og adunay mga smoke emission testing centers nga accredited sa Department of Transportation and Communications (DOTC) aron dili marehestro ang mga sakyanan nga magbuga og itom kaayo nga aso, apan daghan gihapon nga smoke belching vehicles sa karsada.   Naaktohan sa Banat Manobela ang usa ka sakyanan nga nagpa-smoke test didto sa Smoke Emission Testing Center duol sa Land Transportation Office (LTO) sa dakbayan sa Talisay kaniadto’ng Miyerkules.

Sa wala pa butangi sa kahimanan ang tambutso sa sakyanan, gipaandar pagkusog ang makina ug mibuga ang pwerte ka itom nga aso nga susama nga adunay nagdaob likod sa sakyanan.

Dihang gipasok na ang kahimanan ngadto sa tambutso, gituyo nga wala na gipaandar og kusog ang makina aron dili mobuga og itom nga aso ug kini makapasar sa test.

Ang mga nakasaksi nakapanglingo-lingo diha’ng gideklarar nga “Passed” sa smoke test ang mao nga sakyanan.  (BANAT NEWS)