Konsehal nga patyon unta gusto nga adunay bodyguard
CEBU, Philippines - Nagplano karon si Lapu-Lapu City Councilor Leo Mercado nga mokuha og polis nga mobantay kaniya human siya gitinguha nga patyon unta sulod sa buwangan sa dakbayan sa miagi’ng buwan.
Ang tawo nga mitinguha unta pagpatay sa konsehal napusilan ug napatay usab ni SPO4 Edgar Sagarino. Gusto ni Mayor Paz Radaza nga mahimoan g’yud unta og imbestigasyon ang hitabo.
Matud ni Mayor Radaza nga wala siya’y gipaboran sa maong kaso apan ang iya lang gusto nga mahatagan og igong katin-awan ang matag habig sa pamilyang apektado.
Tungod sa mao nga hitabo dunay uban nga mga opisyal nga misugyot nga kinahanglan nga adunay police escort ang matag konsehal alang sa ilang seguridad.
Apan si Mayor Radaza mipadayag nga malinawon ang dakbayan sa Lapu-Lapu dili susama sa ubang dapit nga delikado ang kinabuhi sa usa ka lokal nga opisyal hinungdan nga kinahanglan sila og police escort.
Ang lagda mao nga kadtong mga opisyal nga mangayo’g police escort kinahanglan nga aprobahan usa sa Camp Crame kun permanente ang ilang tinguha nga magtinil og escort. (BANAT NEWS)
- Latest
