P1M multa sa mopatay og pawikan

CEBU, Philippines - Pagkabilanggo sulod sa 12 ka tuig ug labing taas P1 milyon ang multa niadtong responsabli sa pagkasamad sa green sea turtle nga naluwas sa baybayon sa Barangay Bato, dakbayan sa Toledo.

Kini ang bahad sa Department of Environment and Natural Resources sanglit gimando sa balaud ang maong silot.

Matud ni DENR-7 Executive Regional Director Isabelo Montejo nga bisan kinsa nga mapamatud-an nga mipatay o nipasipala sa mga wildlife species mahimong pahamtangan sa maong silot.

Gipahibawo ni Montejo nga banhawon sa iyang buhatan ang Task Force Pawikan subay sa nakita nga padayon nga pagpanakop sa mga pawikan ug pagbaligya niini sa mga kan-anan sa kamerkaduhan sa dakbayan sa Sugbo sama sa Barangay Pasil.

Ang Task Force Pawikan langkuban sa kapolisan, ubang ahensiya sa kagamhanan ug mga local government units nga tahasan sa pagdakop sa makalapas sa balaod batok pagpanakop, pag-ihaw ug pagluto sa pawikan.

Samtang nipagawas usab og kamandaun si Montejo nga nagmando sa tanang regional technical directors for protected area, wildlife, and coastal zone management services sa pagpahigayun kanunay og monitoring sa mga lugar nga sagad puy-an o itlogan sa mga green sea turtles sulod sa  Tanon Strait Protected Seascape (TSPS).

Kini aron mahingusgan ang pagprotehir ingon man ang hugot nga pagpatuman sa environmental laws labi na sa Barangay Bato, dakbayan sa Toledo diin naluwas ang samaron nga pawikan. (Chester Abadilla/GMR)

Ginabas nga kahoy gisakmit

Gisakmit sa kapolisan ang nagkadaiyang sukod sa ginabas nga kahoy nga Magtalisay nga ilegal nga gipamutol ug gipagabas nga walay permiso sa Department of Environment and Natural Resources (DENR)-7 sa sitio Capisanan, Casili, dakbayan sa Mandaue niadtong Miyerkules sa hapon.

Si Senior Insp. Romel Luga, hepe  sa Presinto 6 sa Mandaue City Police Office (MCPO), maoy nangulo sa pagsakmit apan nakaeskapo ang mga tawo nga nagpasiugda sa pagpamutol niini.

Ang pagsakmit nila ni  Luga sa maong mga pinutol nga kahoy natigayon human nangayo og panabang si Casili Barangay Kapitan Paterno Cabatingan nga maoy nakamatikod sa ilegal nga pagpamutol sa kahoy.

Sumala ni Cabatingan nga usa ka Trencio Mendaros Son sa maong lugar ang niangkon  nga tag-iya sa tulo ka dagkong punoan sa kahoy nga Magtalisay nga gipamutol sa wala hiilhing mga tawo.

Ang tulo ka punoan sa Magtalisay giingong mitubo sa lugar sulod sa dugay nang panahon. (/GMR)(BANAT NEWS)