4 sakay sa PUJ gitulis
CEBU, Philippines - Nagkurog pa sa kahadlok nga nitaho sa kapolisan ang usa ka call center agent human gitulis kauban sa lain tulo samtang luwan sa usa ka public utility jeepney sa Jagobiao, dakbayan sa Mandaue niadtong Huwebes sa tungang gabii.
Si PO2 Richard Ares sa Presinto 3 sa Mandaue City Police Office (MCPO) miila sa biktima nga si Lovely Abaigar Perales, 27, minyo, taga Poblacion, Compostela.
Matud sa biktima nga ang tulo kinsa nakuhaan usab sa ilang salapi, cellphone ug mga alahas wala na lang mosumbong sa kapolisan kay pulos nagdali sa ilang lakaw.
Usa ka lalaki nga kauban nilang pasahero nga gibanabana nga anaa sa 20 anyos ang panuigon ang kalit lang nanion og armas nga kalibre .357 ug mideklarar og tulis.
Gikuha ang shoulder bag sa biktima nga adunay cellphone, salapi ug uban pa niining mga butang ug pagkahuman nagdaling nanaug ug misakay sa nagsunod nga motorsiklo.
Sila si PO3 Carlos Zapanta ug PO1 Christopher Bongo ang dali nga nakatubag sa alarma apan wala na nila igkita ang mga tulisan nga sakay sa motorsiklo. (/GMR)(BANAT NEWS)
- Latest
