Misayaw og ‘budots’ gipatay
CEBU, Philippines - Sayo nga naundang ang binuntaga’y unta nga disco sa Lungsod sa San Fernando, human usa ka lalaki ang gipatay ug duha ang naangol dihang dunay usa ka batan-on ang kalit nga namusil sa sulod sa sports complex sa maong lungsod.
Patay si Joseph Earl Padillo, 21, taga Barangay San Isidro, San Fernando ug naangol sila si Junlee Generalao, 18, ug Carina Badana, 44, taga Inayawan Cebu City. Base sa imbestigasyon nalingaw unta pagsaway og “budots†ang kabataan sud sa maong complex dihang kalit nga gipusil sa wa pa mailhing batan-on si Padillo tumong sa ulo.
Ang amigo ni Padillo nga si Generalao daling midagan apan gipusil usab kini ug naigo sa iyang paa, samtang ang namista ug naglingaw-lingaw unta nga si Badana naigo usab sa iyang tiyan.
Walay nakakita kung diin midagan ang mamumuno sanglit misagol kini dayon sa nagkatibulaag nga mga tawo paggawas sa maong sports complex.
Matud pa ni PO1 Lauro Laurel, imbestigador sa San Fernando Police Station nakadawat sila og report nga panagbingkil sa duha ka gangs ang hinungdan sa maong kagubot.
“Naestorya namo ang amigo sa namatay, bikil diay sa Crips ug Bloods,†matud pang Laurel nga nahinabi sa Banat News.
Nagduda ang kapolisan nga gipalusot lang sa likod sa sports complex ang armas nga gituohang usa ka kalibre .45.
Dali pa unta nga gidala sa Carcar District Hospital ang tulo ka biktima apan nakabsan gayod sa kinabuhi si Padillo. Duha ka basiyo sa bala sa kalibre .45 ang nakuha diha sa crime scene. Padayon pa karon ang kapolisan pag-imbestigar sa maong krimen. (/EIM)(BANAT NEWS)
- Latest
