Pagdaginot sa tubig ug pangandam sa El Niño

CEBU, Philippines - Bisan pa sa pagpasalig sa Metro Cebu Water District (MCWD) nga dunay igong suplay sa tubig niining pagkasinati sa grabeng kainit ang maong ahensiya miawhag usab kini sa mga konsumedor sa pagdaginot ug pagpundo og tubig.

Ang Public Information Officer sa MCWD nga si Charmaine Rodriguez mibutyag nga sa nasinating kainit karon dunay mga lugar sa Metro Cebu nga hinay ug mapawong ang suplay sa tubig.

Ang maong mga lugar naglangkub sa  Barangay Lahug, Banawa, Opra, dakbayan sa Sugbo, Tabunok ug Lagtang sa dakbayan sa Talisay, Barangay Talamban sa dakbayan sa Sugbo, Mandaue ug pipila ka bahin sa siyudad sa Lapu-Lapu.

Ang MCWD miawhag sa mga konsumedor sa pagpundo og tubig gikan sa alas 10:00 sa gabii panahon sa gamay lang ang mogamit og tubig.

Hinuon matud ni Rodriguez nga walay angayang kabalak-an tungod kay kasagaran sa ilang tinubdan karon sa tubig naggikan sa ilawom sa yuta kon “underground wells.” Dugang ni Rodriguez nga sulod niining tuiga dunay dugang water source ang paandaron sa MCWD sulod niining tuiga.Sa laing bahin, ang kagamhanan sa dakbayan sa Sugbo migahin og P5.2 milyones nga pundo nga magamit sa mga mag-uuma diha sa kapin 30 ka bukirang barangay sa dakbayan nga mapalit og mga tambal alang sa ilang mga hayop.

Sila si Konsehal Mary Ann delos Santos, James Cuenco, Hanz Abella, Dave Tumulak ug Gerardo Carillo nagkanayon nga angayang mangandam na sa umaabot nga El Niño sa sunod buwan. (BANAT NEWS)