Mga establisamentong gireklamo sa mga senior citizen gipaesplikar

CEBU, Philippines - Si Cebu City Mayor Michael Rama nakauyon ra sa paagi sa Office of Senior Citizens Affairs (OSCA) pagkontrolar sa mga senior citizens nga magparehistro sa dakbayan aron makadawat usab og financial assistance.

Samtang ang City Legal office mipatawag og tigom sa mga tagdumala sa mga establisamento nga gireklamo kay wala  sila mohatag og diskwento sa mga senior citizens. Pipila  sa mga gipaesplikar nalakip sa mga botika, apan nasayran nga sagad sa hinungdan mao nga way generic name ang ilang reseta nga maoy gilatid sa balaod aron maka-avail sa 20 percent discount, apan duna say gasolinahan nga miangkong nasayop sila ug miscommunication ang nahitabo tali sa ilang kahera. Si Rama nagkanayon nga normal ra nga daghang senior citizens ang na-attract sa maong hinabang sa Cebu City government apan duna usab mga nag-take advantage busa gikinahanglan na kining kontrolon usab.

“There got to be also constraints that OSCA has thought about kay abuses can come when there is influx. And when there is influx and you don’t put any clear restrictions, what happens? It creates confusion and corruption,” si Rama nagkanayon bahin sa sistemang gipatuman ni OSCA head Rolando Llaguno, gikomendahan kini ni Rama.

Si Rama nipasabot nga gusto niyang ipadayon ang paghatag og financial assistance sa mga senior citizens sud sa pila ka tuig maong kinahanglan nga duna gyud silay gilaing budget niini. Duna karoy kapin sa 58,000 ka mga senior citizens nga narehistro sa dakbayan sa Sugbo. Ang uban kanila gikan pa sa ubang lugar apan tuyo lang gyud nga nibalhin og puyo dinhi sa Sugbo para makadawat usab sa maong P10,000 nga tinuig nga cash assistance.  (BANAT NEWS)