Mamuhatay og armas sikop

CEBU, Philippines - Gisikop sa kapolisan ang usa ka tigbuhat og armas sa dakbayan sa Danao diin nasakmit ang nagkalain-laing kalibre sa armas niadtong Lunes sa hapon.

Si PO2 Ronald Gomez sa Danao Police Station miila sa dinakpan nga si Peter Enriquez  Durano, hingkod ang panuigon, nagpuyo sa maong dapit.

Nasakmit gikan kaniya ang upat ka kalibre .45 ug usa ka magazine,  usa ka KG-9,  unom ka kalibre .38 ug usa ka kalibre .22 magnum revolver.

Sila si Sr. Insp. Amadeo Pepito ug mga sakop sa Criminal Investigation and Detection Group-7 maoy nagpasiugda sa operasyon.

Kini human nakadawat ang kapolisan og kasayuran sa ilegal nga pagpamuhat og armas sa suspetsado.

Human nasuta ang kalihukan, gipahigayun ang buy bust operation pinaagi sa usa sa ilang kauban nga polis nga nagpakaaron-ingnon nga taga laing lalawigan ug gusto nga mopalit og armas.

Gidala sa suspetsado ang police decoy sa dapit nga nahimutangan sa mga armas ug gipahigayun ang pagbayad sa mga armas nga gipalit nga miresulta sa pagkasikop dihang kalit nahidangat ang kaubanang kapolisan.

Si Gomez miingon nga ang suspetsado kasamtangan karon nilang gitanggong sulod sa ilang detention cell ug kasong kalapasan sa ilegal nga pagpamuhat og armas ang ilang giandam. (Romeo T.  Limpangog/GMR)

Nagtagay gipusil patay

Gipusil patay ang usa ka lalaki nga gikan nagtagay kauban sa iyang mga amigo sa Barangay Talamban, dakbayan sa Sugbo kagahapon sa kadlawon.

Ang biktima giila nga si Aries Theo Gualiza, 32, ulitawo, nagpuyo sa sitio Kambawog, Barangay Talamban.

Sa imbestigasyon sa Homicide Section sa kapolisan, nasayran nga kalit lang usa ka wala mailhing lalaki ang niduol sa biktima samtang nakigtagay sa iyang mga amigo dayun pusil tumong sa ulo sa biktima.

Naabtan sa mga sakop sa Crime Scene Investigation Unit (CSIU) nga nagbuy-od na ang biktima ug gideklarar sa mga sakop sa Emergency Rescue Unit Foundation (ERUF) nga patay na.

Nakuha sa kapolisan sa crime scene ang usa ka deformed slug sa wala pa matino nga kalibre sa armas.

Padayun pang giimbestigar sa kapolisan ang maong kaso aron pagtino sa motibo sa pagpamusil ug pagtumbok sa responsabli sa krimen. (BANAT NEWS)