Lisensiya sa kontrobersiyal nga tambalanan hayan di ma-renew

CEBU, Philippines - Nameligro nga dili ma-renew ang lisensiya sa Cebu Puericulture and Maternity House Inc. human sa nahitabong insidente kabahin sa giingong pag-plaster sa usa ka medical personnel niini sa baba sa bag-ong gipanganak  nga kusog mohilak.

Nasayran nga sa “10-steps to successful breastfeeding” ang maternity house nakalapas sa step 9  nga nagdili sa paghatag og artificial teats ug bibiron sa mga masuso.

Ang maong hospital gipaubos na karon sa assessment sa DOH-7 aron mahatagan sila og “Mother-Baby Friendly Hospital Certificate” tungod kay kun wala kini posibleng dili ma-renew ang ilang lisensiya.

Si Dr. Josie Ann Danes miingon nga dili nila pahamtangan og silot ang maong tambalanan apan ilaha kining tabangan aron makatuman sa unsay gipangayo sa DOH.

Ang maternity house wala pa madeklara nga “mother-baby friendly hospital” hinoon adunay pa silay igong panahon pagkuha sa tanang mga gikinahanglan tungod kay sa Oktubre ning tuiga pa sugdan ang pag-renew sa lisensiya. Samtang ang tigpamaba sa DOH-7 Suzette Jabonete miingon nga langay kaayo ang gihimong aksyon sa maong hospital pagtubag sa  insidente. Hinoon malaumon sila nga dili motugot ang maong tambalanan nga maguba ang ilang reputasyon gumikan lang sa maong hitabo.

Nasayran nga ang breastfeeding policy sa DOH gibase sa United Nations Children Fund (UNICEF) ug World Health Organization standards. Nakagawas na ang batang giingong gitaptapan og plaster, ug giklaro sa amahan niini nga sakto ang ilang gibayad sa maong hospital ug wala sila mo-avail sa gitanyag nga discount sa maong tambalanan. Subli nilang giklaro nga di nila tumong nga dauton ang reputasyon sa maong tambalanan kay buot lang nila nga makorehian ang maong sayop nga gihimo ngadto sa ilang anak. (BANAT NEWS)