“Napolist” panglawgaw lang–CAPBS

CEBU, Philippines - Karon nga gipagawas na sa Senado ang mga ngalan sa mga  senador ug kongresista  nga gitawag karon og  "napolist" o Napoles List gihulagway kini sa Coalition Against Pork Barrel System nga usa lang kini ka diversionary tactic aron mabulabog ang kaso. Matud sa legal consultant sa grupo Atty. Rex Fernandez nga ang pagpagawas sa listahan adunay maayo ug dili maayong epekto.

Maayo kini tungod kay mahibaw-an gyud sa katawhan ug alang na usab sa transparency, apan gikwestyon sa grupo ang tayming sa pagpagawas niini.

Nasayran nga daghang mga senador ug kongresista ang mihimakak nga nalambigit sa maong kontrobersiya apan alang sa grupo nga sama ra sila  sa usa ka kawatan nga di moangkon sa ilang sala bisan og nasakpan na.

Samtang alang kang political analyst Richard Fernandez, tungod kay daghang mga opisyales ang gilambigit sa isyu di malikayan nga masulod sa huna-huna sa tawo kun katuohan ba o dili ang listahan o usa lang ka pamaagi  aron kadtong mga tawo nga sad-an ang makalingkawas sa kaso.

Gidugang ni Fernandez nga ang dakong hagit karon sa maong isyu kun unsaon paglusot sa mga politiko nga naduhigan ang pangalan. (BANAT NEWS)