CEBU, Philippines - Magpakitabang sa Malacañang ang mga labor sector dinhi sa Sugbo alang sa pagpa-resign sa opisyal sa Department of Labor and Employment (DOLE-7) sa nagdumala sa National Labor Relation Commission (NLRC) .
Sigon pa sa pangulo sa Living Wage Coalition nga si Metudio Belarmino sa usa ka interview sa radyo nga usa o duha ka semana gikan karon ilang ihatud ang ilang petisyon ngadto sa buhatan ni Presidente Benigno Simeon Aquino III.
Kini aron pagtinuod sa ilang panawagan niadtong Mayo Uno nga papahawaon ang mga opisyal sa DOLE ug NLRC tungod kay wala kini magtagad sa kaayohan sa mga mamumuo.
Matud pa ni Belarmino nga base sa ilang nahipos nga mga dokumento sa mga kaso sulod na sa 20 ka tuig gikan sa mga mamumuo nga mga sakop niini nga ang naasoy nga mga opisyal nidapig kanunay sa mga gikihang mga magpapatigayon.
Sigon pa nila nga ang tanang mga labor groups nipaluyo sa naasoy nga petisyon hinungdan nga daghan gyud ang nipirma sa ilang petisyon nga ilang iduso sa buhatan sa presidente.
Gipahibawo usab niini nga ila unya hatagan og kopya ang kalihim sa DOLE sa higayon nga madawat na sa presidente ang ilang petisyon. (BANAT NEWS)