JVR ug anak, hayan pasakaan og kaso

CEBU, Philippines -  Konseho sa dakbayan sa Talisay mibahad nga mokiha kang Mayor Johnny De los Reyes tungod sa pag-implementar niini og proyekto sa siyudad nga walay pagtugot sa konseho.

Apan si De los Reyes nga nahinabi sa mga tigbalita kagahapon mihimakak sa maong pasangil ug miinsister nga misubay siya sa balaod apan ang mga contractor nga nakadaog sa bidding mao nay mirisgo sa pag-construct sa proyekto bisan og nagproseso pa sila sa mga rekisitos.

Matud sa mayor nga kung ugaling moduso og kaso batok kaniya ang konseho sa siyudad iyaha kining atubangon.

Si Talisay City Administrator John Yre De los Reyes ug head sa Bids and Awards Committee (BAC) sama sa iyang amahan mihimakak usab kini sa pasangil ug misumbalik pasangil nga pamolitika ang gibuhat sa konseho.

Sa ikaduhang higayon, wa motambong sa pagpatawag sa Konseho ang administrador aron unta pangutan-on bahin sa 12 ka infrastructure projects nga mikabat ngadto sa P9,436,469.25 nga ang kontrata walay pagtugot sa konseho.

Si Vice Mayor Romeo Villarante miingon nga ang pagmagahi pagtambong ni John Yre , maisip nga kalapasan sa Akta Republika 6713 kon “The Code of Ethical Standards for Public Officials and Employees.”   (BANAT NEWS)