Napusilan nakiglayog sa suspek

CEBU, Philippines -Nakalingkawas sa kamatayon ang usa ka lalaki nga grabeng naangol sa pagpamusil apan nakahigayon pa sa pagpakiglayog sa suspek sa pag-ilog sa armas  ala una pasado sa niaging kaadlawon sa Barangay Casili, lungsod sa Consolacion. Si PO1 Socrates Borinaga sa Consolacion Police Station miila sa biktima nga si Randy Lopez, 39, minyo ug ang suspetsado mao si John Philip Taborada, 20, silingan sa biktima.

Matud ni Borinaga nga nagsakay sa iyang motorsiklo ang biktima padulong pauli sa ilang panimalay ug ang suspetsado nga nag-atang na daan sa maong dapit kalit lang namusil. Naigo sa bukton ang biktima nga nakaingon sa pagkalamba sa giluwanang motorsiklo.

Sa dihang giduol sa suspetsado aron pagsuta kun patay ba ang biktima, kalit kining mibangon ug nakiglayog sa pag-ilog sa armas. Ang suspetsado nakahigayon gihapon sa pagkablit sa gatilyo sa armas nga maoy hinungdan nga napusilan na usab ang biktima sa toong bahin sa liog, toong paa ug sampot. Nakaboto ang tanang bala nga gikarga sa .38 kalibre maong nakahukom kini sa pagdagan pahilayo. (/GMR)(BANAT NEWS)