Duha nanulis internetan nadakpan

CEBU, Philippines - Nadakpan ang duha ka tawo nga nanulis og internet café sa Barangay Bakilid, dakbayan sa Mandaue dihang nasigpatan sa mga polis ang giluwanang motorsiklo niadtong Domingo sa hapon.

Ang nadakpan mao sila si Nestor Saute Leceña Jr., 27, taga Sitio Ngolok, Subangdaku, Mandaue ug Leonilo Clarin Dalogdog, 53, taga Sitio Humay-Humay, Pajo, dakbayan sa Lapu-Lapu.

Ang duha maoy suspetsado sa pagtulis kang Irish Maestre, 20, taga Barangay Looc, dakbayan sa Mandaue ug cashier sa MDEL Internet Café nga nahimutang sa dalan A.S. Fortuna, Banilad, sa maong dakbayan.

Giasoy ni Maestre ngadto nila ni PO2 Jesse Gaquit ug PO1 Renante Sumaljag sa Presinto 2 sa Mandaue City Police Office (MCPO) nga kalit lang misulod ang usa ka lalaki nga nagdala og armas nga  kalibre .38 ug gition dungan ang pagdeklarar nga tulis.

Gisakiyo sa tulisan ang P5,000 nga salapi nga gisulod sa kaha ug duha ka mga cellphones ug dali nga nigawas sakay sa nagpaabot nga yellow XRM nga motorsiklo nga nagdala sa plate number 7QA 793.

Ang motorsiklo nga gihulagway sa biktima nasigpatan ni Gaquit ug Sumaljag sa ilang paglabay sa flyover sa Barangay Subangdaku nga gi-parking sa dapit diin usab si Leceña magpuyo.

Si Leceña nga gisukitsukit sa kapolisan mao ra usab ang niila sa laing kauban nga si Dalogdog kinsa nadakpan sa gipuy-an sa Barangay Pajo, dakbayan sa Lapu-Lapu ug nakuha gikan kaniya ang duha ka cellphones sa biktima nga nagsilbi nilang ebidensiya. (/GMR)(BANAT NEWS)