Karibal sa gugma namusil
CEBU, Philippines - Naundang ang pagkaamigo nga miresulta pa sa pagpamusil sa usa ka lalaki human iyang nasayran nga naunhan na diay siya sa iyang amigo sa gugma sa usa ka babaye.
Ang biktima giila nga si Jeraldo Regner Calambro, 32, usa ka pintor nga taga sitio City Central, Barangay Luz, dakbayan sa Sugbo samtang ang suspek naila nga si John Carl Fat, 20, suod nga amigo sa biktima.
Ang duha giingong nag-ilog sa gugma sa usa ka babaye nga naila lang sa pangan nga Stefanie Miller kinsa nahimong puyo-puyo ni Calambro.
Matud ni SPO4 Rey Cuyos, imbestigador sa Homicide Section sa Cebu City Police Office, nga samtang naglakaw ang biktima pauli sa ilang pinuy-anan kauban sa babaye alas 11 sa gabii niadtong Domingo, ilang naagian ang suspetsado.
Giingong gibugalbugalan sila sa suspetsado hinungdan nga giduol sa biktima.
Ang suspetsado giingong kalit nibunot og wala matino nga kalibre sa armas ug gipusil ang biktima.
Nakalikay ang biktima ug midaplis lang ang bala sa ulo ug miresulta sa ilang panag-ilogay sa armas ug midagan ang suspetsado. (/GMR)(BANAT NEWS)
- Latest
