Ilawom sa Tabunok flyover hugaw gihapon

CEBU, Philippines - Bisan pa sa mga pahibalo sa pagdili og pataka’g labay sa basura, daghan gihapon basura ilawom sa flyover sa Tabunok, dakbayan sa Talisay.

Gibutang usab sa maong pahibalo ang mga multa ug silot sa mga magpataka og labay sa ilang sagbot apan wala panumbalinga.

Ang hepe sa Talisay City Police Station, Supt. Reycel Carmelo Dayon, nisangon sa mga sakop sa Flying Squad sa pagdakop sa mga magpataka og labay sa ilang basura.

Ang mga sakop sa Flying Squad nga naghupot og Temporary Operators’ Permit (TOP) gisangonan usab sa pagsikop sa mga magpataka og parking sa ilang sakyanan. Gipasabot ni Dayon nga ang Flying Squad daku og tabang sa kapolisan sa pagsikop sa mga badlongong drayber nga magpataka lang og parada sa ilang sakyanan nga maghatag og kahuot sa trapiko nga usahay moresulta pa ngadto sa disgrasya.

Sayo niini ang Commission on Audit (COA) miingon nga ang trabaho sa Flying Squad nisapaw sa City of Talisay-Traffic Operation Development Authority (CT-TODA).

Usa sa mga trabaho sa CT-TODA ang pagmando sa trapiko ug pagbadlong sa mga badlongong drayber. (BANAT NEWS)