Hapon nailad pekeng dolyar

CEBU, Philippines - Maayong pagkailad sa usa ka Hapon human iyang gibaylo-an ang iyang P30 mil ka pesos sa $600 nga peke gikan sa tulo ka mga mangingilad sa usa ka dakung mall sa Mabolo, dakbayan sa Sugbo.

Dali nga nagpakitabang sa Theft and Robbery Section sa Cebu City Police Office ang Hapon nga si  Chiba Hiromu, taga Miyagi, Japan ug kasamtangang nagpuyo sa dakabayan sa Sugbo.

Matud sa biktima nga samtang siya naglakaw sulod sa mall, usa ka batan-ong nga babaye nga nagpaila nga usa ka Andrea ang miduol kaniya ug nakig-amigo. Human sa pipila sa minutos, giimbitar matud pa ang maong langyaw nga mokuyog sa dalaga paingon sa ilang panimalay sa wala masayri nga lugar.

Pag-abot nila sa balay sa dalaga, gisugat siya sa lain pang tulo ka suspek kinsa nagpa-ila nga amahan ug inahan sa dalaga ug usa usab ka langyaw nga nagpaila nga Singaporean.

Sulod sa panimalay, nakigdula pa og baraha ang mga suspek nga gitawag og “Black Jack” ug samtang nalingaw na ang biktima, gitanyagan kini nga ilisan ang dala niya nga 30 mil ka pesos sa $600.

Apan daku nalang ang kahikurat sa Hapon nga sa dihang iya na unta nga gipailisan ang maong dolyar sa usa ka money changer duol sa iyang gipuy-an, nahibaw-an na lamang niya nga peke diay.

Gipakita sa mga personahe sa TRS ang mga hulagway sa mga iladong mangingilad sa dakbayan sa Sugbo, apan wala’y natumbok Hapon.

Nakalimot usab ang biktima sa dapit nga gidalhan kaniya sa batan-ong babaye. (BANAT NEWS)